ฉสุ อภิญฺญาสุ วสีภาวํ ปาปุณิ ฯ เอวมฺปิ ตถาคโต โยคญฺญู เทสนากุสโลติ ฯ
สาธุ ภนฺเต นาคเสน สุนิเวธิโต ปญฺโญ พหุวิเธน การเณน คหนํ อคหณํ กตํ
อนฺธกาโร อาโลโก กโต คณฺฐิ ภินฺนา ปรปฺปวาทา ภคฺคา ชินปุตฺตานํ จกฺขุ ตยา
อุปฺปาทิตนฺติ ฯ

วตฺถคุยฺหนิทสฺสนปญฺโห ปฐโม ฯ

ภนฺเต นาคเสน ภาสิตมฺปิ จตํ เถเรน สารีปุตฺเตน ธมฺมเสนาปตินา
ปริสุทฺธวจีสมาจาโร อาวุโส ตถาคโต นตฺถิ ตถาคตสฺส วจีทุจฺจริตํ ยํ ตถา คโต รกฺเขยฺย
มา เม อิทํ ปโร อญฺญาสีติ ฯ ปุน จ ตถาคโต เถรสฺส สุทินฺนสฺส กลนฺทปุตฺตสฺส
อปราเธ ปาราชิกํ ปญฺญาเปนฺโต ผรุสาหิ วาจาหิ โมฆปุริสวาเทน สมุทาจรติ ฯ เตน
จ โมฆปุริสวาเทน โส เถโร คุรุจิตฺตุตฺราสน วเสน ตสิโต วิปฺปฏิสารี นาสกฺขิ อริยมคฺคํ
ปฏิวิชฺฌิตุํ ฯ ยทิ ภนฺเต นาคเสน เสน ปริสุทฺธวจีสมาจาโร ตถาคโต นตฺถิ ตถาคตสฺส
วจีทุจฺจริตํ เตนหิ ภควตา เถรสฺส สุทินฺนสฺส กลนฺทปุตฺตสฺส อปราเธ โมฆปุริสวาเทน
สมุทาจิณฺณนฺติ ยํ วจนํ ตํ มิจฺฉา ฯ ยทิ ภนฺเต นาคเสน ภควตา เถรสฺส กลนฺทปุตฺตสฺส
อปราเธ โมฆปุริสวาเทน สมุทาจิณฺณํ เตนหิ ปริสุทฺธวจีสมาจาโร ตถาคโต นตฺถิ ตถาคตสฺส
วจีทุจฺจริตนฺติ ตมฺปิ วจนํ มิจฺฉา ฯ อยํ อุภโต โกฏิโก ปญฺโห ตวานุปฺปตฺโต โส
ตยา วิสชฺชิตพฺโพติ ฯ
ภาสิตมฺปิ เจตํ มหาราช เถเรน สารีปุตฺเตน ธมฺมเสนาปตินา ปริสุทฺธวจี
สมาจาโร อาวุโส ตถาคโต นตฺถิ ตถาคตสฺส วจีทุจฺจริตํ ยํ ตถาคโต รกฺเขยฺย
มา เม อิทํ ปโร อญฺญาสีติ ฯ อายสฺมโต สุทินฺนสฺส กลนฺทปุตฺตสฺส อปราเธ
ปาราชิกปญฺญาปเน ภควตา โมฆปุริสวาเทน สมุทาจริตํ ฯ ตญฺจ ปน อทุฏฺฐจิตฺเตน
อสารมฺเภน ยาถาวลกฺขเณน ฯ กิญฺจ ตตฺถ ยาถาวลกฺขณํ ฯ ยสฺส มหาราช ปุคฺคลสฺส
อิมสฺมึ อตฺตภาเว จตุสจฺจาภิสมโย น สมฺภวติ ตสฺส ปุริสตฺตนํ โมฆํ อญฺญํ กยิรมานํ
อญฺเญน สมฺภวติ เตน วุจฺจติ โมฆปุริโสติ ฯ อิติ มหาราช ภควตา อายสฺมโต สุทินฺนสฺส
กลนฺทปุตฺตสฺส สภาววจเนน สมุทาจริตํ โน อภูตวาเทนาติ ฯ สภาวํปิ ภนเต นาคเสน
โย อกฺโกสนฺโต ภณติ ตสฺส มยํ กหาปณทณฺฑํ ธาเรม อปราโธเยว โส วตฺถุํ นิสฺสาย
ตตฺถ วิสุํ โวหารํ อาจรนฺโต อกฺโกสตีติ ฯ อตฺถิ ปน มหาราช สุตปุพฺพํ ตยา ขลิตสฺส
อภิวาทนํ วา ปจฺจุปฏฺฐานํ วา สกฺการํ วา อุปยานํ วา ธนุปฺปทานํ วาติ ฯ น

หิ ภนฺเต ยโต กุโตจิ ยตฺถ กตฺถจิ ขลิโต โส ปริภาสนารโห โหติ ตชฺชนียารโห อุตฺตมงฺคํปิ
ตสฺส ฉินฺทนฺติ ฆาเตนฺตีติ ฯ เตนหิ มหาราช ภควตา กิริยาเยว กตา โน
อกิริยาติ ฯ กิริยํปิ ภนฺเต นาคเสน กุรุมาเนน ปฏิรูเปน กาตพฺพํ อนุจฺฉวิเกนปิ สวเนน
ภนฺเต นาคเสน ตถาคตสฺส สเทวโก โลโก ครุโก โอตฺตปฺปติ หิริยติ ภิยฺโย ทสฺสเนน
ตทุตฺตรึ อุปสงฺกมเนน ปยิรุปาสเนนาติ ฯ อปิ นุ โข มหาราช ติกิจฺฉโก อภิสนฺนโกฏฺฐสฺส
โกฏฺฐเหตุ ติณฺหานิ เลหนียานิ วิเรจนานิ เทตีติ ฯ เอวํปิ ภนฺเต อาโรคฺยกาโม
เทตีติ ฯ เอวเมว โข มหาราช ตถาคโต วมยมาโน สพฺพกิเลสพฺยาธีนํ วูปสมาย อนุสตฺถึ
เทติ ฯ ผรุสาปิ มหาราช ตถาคตสฺส วาจา สตฺเต สิเนหยติ มุทฺเก กโรติ ฯ ยถา
มหาราช อุณฺหํ อุทกํ ยํ กิญฺจิ สิเนหนียํ สิเนหยติ มุทุกํ กโรติ เอวเมว โข มหาราช
ผรุสาปิ ตถาคตสฺส วาจา อตฺถวตี โหติ การุญฺญสหคตา ฯ ยถา มหาราช ปิตุ วจนํ
นาม ปุตฺตานํ อตฺถวนฺตํ การุญฺญสหคตํ เอวเมว โข มหาราช ผรุสาปิ ตถาคตสฺส วาจา
อตฺถวนฺตี โหติ การุญฺญสหคตา ฯ ผรุสาปิ มหาราช ตถาคตสฺส วาจา สตฺตานํ
สพฺพกิเลสนาสนา โหติ ฯ ยถา มหาราช ทุคฺคนฺธํปิ โคมุตฺตํ ปีตํ อสาตํปิ อคทํ ขายิตํ
สพฺพพฺยาธึ หนติ เอวเมว โข มหาราช ผรุสาปิ ตถาคตสฺส วาจา น กสฺสจิ ทุกฺขํ
อุปฺปาเทติ ฯ ยถา มหาราช มหนฺโตปิ ตูลปิจุ ปรสฺส กาเย นิปติตฺวา รุชฺชํ น กโรติ
เอวเมว โข มหาราช ผรุสาปิ ตถาคตสฺส วาจา น กสฺสจิ ทุกฺขํ อุปฺปาเทตีติ ฯ
สุวิสชฺชิโต ภนฺเต นาคเสน ปญฺโห พหูหิ การเณหีติ ฯ

ตถาคตสฺส ผรุสวาจา นตฺถีติปญฺโห ทุติโย ฯ

ภนฺเต นาคเสน ภาสิตมฺปิ เจตํ ตถาคเตน
อเจตนํ พฺราหฺมณ อสุณนฺตํ
ชานํ อชานนฺตมิมํ ปลาสํ
อารทฺธวิริโย ตุวํ อปฺปมตฺโต
สุขเสยฺยํ ปุจฺฉสิ กิสฺส เหตูติ ฯ
ปุน จ ภณิตํ อิติ ผนฺทโน รุกฺโขว ตาวเทว ปฏิภาสถ มยฺหํปิ วจนํ อตฺถิ ภารทฺวาช
สุโณหิ เมติ ยทิ ภนฺเต นาคเสน รุกฺโข อเจตโน เตนหิ ผนฺทเนน รุกฺเขน ภารทฺวาเชน
สทฺธึ สลฺลปิตนฺติ ยํ วจนํ ตํ มิจฺฉา ฯ ยทิ ผนฺทเนน รุกฺเขน ภารทฺวาเชน สทฺธึ